Umuryangoremezo witiriwe Mutagatifu Yozefu, uherereye muri Paruwasi ya Ruhengeri wifatanyije n’abana bawubarizwamo ndetse n’abawuturiye kwizihiza umunsi mukuru wa Noheli, bahabwa ubutumwa bwo kurangwa n’ubuvandimwe.
Ni igikorwa cyabaye ku Gicamunsi cyo kuri uyu wa 26 Ukuboza 2025. Cyaranzwe n’ibyishimo n’umunezero mu bacyitabiriye; barimo abana n’ababyeyi babo, Abakristu basengera muri uwo muryango remezo ndetse n’abaturanyi baturutse mu madini atandukanye, mu rwego rwo gusangira nabo ibyishimo by’iminsi mikuru.
Cyateguwe hagamijwe ko abana basabana bagakina imikino itandukanye ndetse bakarushaho kumenyana.
Mu mpanuro bahawe basabwe kurangwa n’ubuvandimwe kuko aribwo bazubakiraho ejo habo hazaza, bakamenya ko ari abana b’Imana kandi Imana ibakunda. Babwiwe ko Yezu abakunda kurusha abandi bose.
Umuyobozi w’uyu Muryangoremezo, Irere Irene, yabwiye aba bana ko ari impano y’Imana kuri Kiliziya.
Ati: “Bana mwese murangwe n’ubuvandimwe kuko muri impano y’Imana kandi mwishimire Impano y’ubuzima Imana yabahaye binyuze ku babyeyi.”
Umwe mubana bitabiriye uyu munsi witwa Dusenge Ella yavuze ko bashimira ababyeyi bababyaye kandi bahora babifuriza ibyiza.
Ati: “Ndashimira ababyeyi batubyaye, abaturera kuko bakora ibushoboka byose ngo turusheho kuba mu buzima bwiza.”
Iki gikorwa cyateguwe hagamijwe ko abana bishimana n’ababyeyi bigamije kubafasha kurangiza umwaka neza no kubafasha gusangira Noheli n’abaturanyi hagamijwe kubatoza umutima w’urukundo.
UWIHOREYE Bernard/Ijamboryumwana.rw
Imico myiza abana bayikura mu muryango. Dushimiye aba babyeyi ntafashe umyanya bagasabana y’abana kandi bagahuza abna ngo bamenyane.