‘Ndandata Nkurandate’ ni agashya kahanzwe n’abatuye Akagali ka Bweramana, ko mu Murenge wa Muhororo mu Karere ka Ngororero, mu 2019 bagamije kwikura mu bukene no gufasha abana bataye ishuri kurisubiramo.
Ni gahunda yabaye igisubizo ku baturage bo muri ako Kagali bari babayeho mu bukene bukabije, batabasha kubona ibibatunga uko bikwiye, kwishyura Mituweli n’amashuri y’abana kuburyo bamwe bari bararivuyemo.
Abaturage bamaze kubona icyo kibazo, babifashijwemo n’ubuyobozi, baricaye bashaka igisubizo. Nibwo batangije amatsinda y’abifite n’ab’amikoro make hanyuma uwishoboye agafasha utishoboye kugira ngo bazamurane, maze ayo matsinda bayita ‘Ndandata Nkurandate’.
Uku gushyira hamwe byatumye Akagali ka Bweramana kaba aka Mbere mu Karere mu gutanga ubwisungane mu kwivuza, ndetse gahora mu twishyura hakiri kare 100%.
Byabafashije gushakira abana bose bari barataye ishuri ibikoresho nkenerwa basubira kwiga ndetse babasha no gushaka ibisubizo by’ibindi bibazo bitungurana, aho baherutse kubakira mugenzi wabo wasenyewe n’ibiza.
Kuri bu ayo matsinda bafitemo amafaranga bizigamye kuburyo umuturage wese ugize ikibazo bamuguriza agakemura ibibazo afite.
Musabyimana Angelique ubarizwa muri ayo matsinda yabwiye ijamboryumwana ko yababereye igisubizo.
Ati: “Njyewe nishyurirwaga Mituweli na Leta nyuma baza kuducutsa batubwira ko natwe tugomba kwishakamo ibisubuzo tukiyishyurira. Twabonye tutazabasha kuyiyishyurira twisunga Ndandata nkurandate batuguriza amafaranga tuguramo amatungo twishyura Mituweli, twishyura ejo heza, tubasha kwishyurira abana amashuri ndetse tukanatunga imiryango yacu.”
Mugenzi we Ngiruwonsanga Theoneste yavuze ko gusubiza abana mu ishuri ari kimwe mu byo bazahora bibukira kuri ako gashya.
Yagize ati: “Mu byukuri aka Kagali Kari karimo abana benshi bataye ishuri kubera kubura ibikoresho n’amafaranga yo kubishyurura ishuri, ariko aho aka gashya ka Ndandata nkurandate kaziye ababyeyi bo muri aka gace twarasubijwe […] kuri ubu turashima ko mu Kagali kacu abana bose barimo kwiga uko bikwiye.”
Umuyobozi w’Akarere ka Ngororero, Nkusi Christophe yabwiye ijamboryumwana ko aka gashya kabaye igisubizo ku iterambere ry’umuryango muri Bweramana muri rusange.
Ati: “Aka gashya kataraza abana bari barataye ishuri, ariko ubu abana bose barisubiyemo. Niko kamaro k’udushya rero, udushya tuza gukemura ibibazo bitandukanye. Icyo navuga kuri aka gashya ntanubwo ari ibi gusa bigendanye no gusubiza abana mu ishuri hari no kwiteza imbere mu muryango, aho dukangurira abaturage kugira umuco wo kwizigamira kugira ngo bagire ubuzima bwiza bityo n’umutungo babona bawucunge neza.”
Aka gashya ka ‘Ndandata Nkurandate tugeraneyo ku gihe’ kahangiwe muri aka Kagali ka Bweramana gaherutse guhabwa igihembo cya miliyoni 1 Frw na Minisiteri y’ubutegetsi bw’Igihugu nk’agashya kahinduye imibereho y’abaturage kakanahiga utundi mu Karere ka Ngororero.
