Umubyinnyi Sherrie Silver uri mu bakobwa bamaze kubaka izina mu myidagaduro mu Rwanda no mu mahanga, yakusanyije arenga miliyoni 14 Frw azifashishwa mu bikorwa by’uburezi, ubuzima n’imibereho myiza y’abana barererwa mu muryango yashinzwe witwa Sherrie Silver Foundation.
Ni amafaranga yakusanyijwe binyuze muri cyamunara yakorewe mu birori bya ‘The Silver Gala’ byateguwe na Sherrie Silver, byabereye mu Mujyi wa Kigali ku mugoroba wo ku wa Gatandatu tariki 1 Ugushyingo 2025.
Iya mbere muri izi cyamunara ni iy’umupira w’ikipe ya PSG yo mu Bufaransa, wasinyweho n’abakinnyi b’iyi kipe, waguzwe na Mutesi Jolly amadorali 1,000 asaga miliyoni 1.4 mu mafaranga y’u Rwanda.
Andi yatanzwe arimo 800$ ku majoro abiri yo kurara muri Hoteli yo ku Kibuye, 2.900$ yatanzwe ku rugendo rwo gusura ingagi, 1.200$ yatanzwe ku kindi gikorwa cy’urukundo.
Hari kandi 1.800$ y’ijoro ryo kurara muri Hoteli yo mu Kiyovu ndetse na 2,000$ byatanzwe n’uwaguze ijoro rimwe muri Hotel yo mu rwego rwo hejuru. Igiteranyo cy’aya mafaranga yose ni 14.132.625 Frw.
Iyi nkunga yakusanyijwe ni iyo gufasha abana babarizwa muri Sherrie Silver Foundation barenga 1000.
Uretse aya mafaranga BK Foundation yemeye kwishyurira abana 100 bo muri Sherrie Silver Foundation, amashuri yaba ari abiga mu ya Leta cyangwa ayigenga.
Sherrie Silver yashimiye buri wese witabiriye ibi birori bye akitanga, avuga ko aya mafaranga azifashishwa mu bikorwa by’uburezi, ubuzima n’imibereho myiza y’abana batishoboye bafashwa n’umuryango we.
Uyu mubyinnyi w’imyaka 31 ubikora by’umwuga ndetse akabihuza no gukina filimi aherutse kuvuga ko inzozi ze ku bana bahuriye muri Sherrie Silver Foundation, ari izo kuzabona ubuzima bwabo buhinduka mu buryo bugaragarira buri wese.
