Abagore bitabiriye Inama y’inteko rusange y’inama y’igihugu y’abagore (CNF) mu Karere ka Rusizi bavuze ko bagiye kurushaho kwegera imiryango ibanye mu makimbirane no kuganiriza abasore n’inkumi mbere yo gushyingirwa, mu rwego rwo kwirinda amakimbirane ari mu miryango.
Amakimbirane yo mu ngo agaragazwa nk’intandaro y’ibindi bibazo bibangamira imibereho y’abagize umuryango birimo igwingira, inda ziterwa abangavu n’ikibazo cyo guta amashuri kw’abana.
Ikusanyamakuru riheruka gukorwa muri Karere ka Rusizi ryagaragaje ko imiryango 952 ibanye mu makimbirane aturuka ku bintu bitandukanye birimo kutumva neza ihame ry’uburinganire n’ubwuzuzanye; kutumvikana ku mikoreshereze y’umutungo; ubusinzi mu muryango; ubuharike n’ubushoreke.
Umuyobozi w’Akarere ka Rusizi wungirije ushinzwe Imibereho myiza y’Abaturage, Mukakalisa Francine, yabwiye abitabiriye inama y’Inteko Rusange y’Inama y’Igihugu y’Abagore, ko bakwiye kurushaho gushishikariza abagize umuryango kuganira ku biteza amakimbirane mu ngo zabo.
Yagize ati “Kutumvikana ku byemezo byo mu rugo birimo imicungire y’umutungo; umubare w’abana bazabyara; aho abana baziga n’ibindi, ni byo bikurura amakimbirane.”
Uyu muyobozi yagiriye inama iyi miryango, avuga ko buri wese aba afite inshingano mu rugo, bityo akwiriye kuzubahiriza.
Ati “Twumve ko umugabo akwiye gukora ibyo agomba gukora nk’inshingano z’umugabo mu rugo, umugore agakora inshingano ze neza nk’uko agomba kuzikora.”
Umuhuzabikorwa w’Inama y’Igihugu y’Abagore mu Karere ka Rusizi, Ayinkamiye Clementine, yavuze ko nk’abagore bahagarariye abandi, bagiye kurushaho kwegera imiryango ibanye mu makimbirane kugira ngo irusheho kuyavamo.
Ati “Icyo tugiye gukora ni ukurushahaho kwegera iriya miryango ibanye mu makimbirane tukayiganiriza. Icyo gihe ni ukuganiriza abasore n’inkumi mbere yo gushyingirwa, no gushishikariza abashakanye kujya bagira ibiganiro hagati yabo nk’abagize umuryango.”
Mu nama y’Inteko Rusange y’Inama y’Igihugu y’Abagore, ba mutima w’urugo bo mu karere ka Rusizi bihaye intego yo gusubiza mu ishuri abana barenga 700 baritaye.
