Mu muhezo, Urukiko rw’ibanze rwa Nyamabuye mu Karere ka Muhanga ruherutse kuburanisha urubanza ubushinjacyaha buregamo umwavoka ubura igihe gito ngo agire imyaka 75 gusambanya umwangavu w’imyaka 16 akamutera inda.
Ryari iburanisha ku ifungwa cyangwa ifungurwa ry’agateganyo, abari baje gukurikirana uru rubanza bakaba barasohowe mu rubanza kuko byemejwe ko rubera mu muhezo.
Umunyamakuru wa UMUSEKE wari aho rwabereye yatangaje ko iburanisha ryagombaga kuba mbere ya saa sita z’amanywa, ariko abunganizi mu mategeko batanu bunganiraga mugenzi wabo ushinjwa iki cyaha bamwe ntabwo bari bahari, Urukiko rwimurira urubanza saa munani n’igice (14h30).
Ubwo urubanza rwatangiraga, Urukiko rwahaye ijambo Ubushinjacyaha kugira ngo buvuge ibyo bumushinja.
Bwavuze ko burega uwo mugabo bushingiye ku ngingo ya 26 irengera umwana no kurinda imibereho bwite y’umwana igomba kurengera umwana uvugwa muri iyo ngingo.
Ubushinjacyaha bwasabye ko iburanisha ribera mu muhezo.
Mu mpaka zatwaye umwanya utari muto, abunganizi batatu bari bahagararanye na mugenzi wabo uregwa imbere y’inteko iburanisha, babwiye Urukiko ko iryo tegeko rireba umwana gusa mu gihe urubanza rugiye kuburanishwa mu mizi.
Abunganira uregwa bagaragaje ko itegeko uwo rivuga ‘ari umwana uregwa’ kandi akaba ari iburanisha mu mizi y’urubanza.
Ubushinjacyaha bwo bwagaragaje ko ‘atari’ ko itegeko ribiteganya. ko ‘ahubwo’ rireba uregwa n’uwakorewe icyaha ari umwana kandi ko ‘atari’ mu gihe cy’urubanza mu mizi gusa, ‘ahubwo ari’ iburanisha iryo ari ryo ryose mu gihe uregwa cyangwa uwakorewe icyaha ari umwana.
Bwanzuye ingingo yabwo buvuga ko bityo hagomba kubahirizwa ibiteganywa n’itegeko urubanza rukabera mu muhezo.
Urukiko rwanzuye ko iburanisha ry’uru rubanza rigiye kubera mu muhezo, abunganizi batambaye umwenda wabugenewe badahari, ndetse n’abari baje gukurikirana iburanisha bose basohotse mu rukiko.
Amakuru avuga ko igihe uwo mwana yasambanyirijwe, yari afite imyaka imyaka 16 y’amavuko kandi akaba yarabyaye , ubu akaba afite umwana w’imyaka ibiri.
Uregwa iki cyaha afite imyaka hafi 75 y’amavuko.
