Minisiteri y’Uburezi (MINEDUC) yatangaje amanota y’ibizamini bya Leta ku basoze amashuri yisumbuye mu mwaka w’amashuri wa 2021-2022.
Abize mu mashuri y’ubumenyi rusange batsinze ku kigereranyo cya 94.6%, mu ya Tekiniki batsinda kuri 97.8% naho mu y’Inderabarezi (TTC) ni 99.9%.
Mu mashuri y’ubumenyi rusange abakobwa barushije basaza babo kuko hatsinze abangana na 50.6%, mu mashuri ya tekinike, abahungu baza imbere baba 52.6% naho muri TTC abakobwa banikira abahungu batsinda ari 60,3%.
Umunyamabanga wa Leta muri Minisiteri y’Uburezi Ushinzwe amashuri abanza n’ayisumbuye, Twagirayezu Gaspard, yashimiye abanyeshuri bitwaye neza mu bizamini, abarimu ndetse n’ababyeyi.
Ati “Ndagira ngo nshimire abanyeshuri bari hano bashoboye gukora cyane kurusha abandi n’abarimu bagize uruhare muri iyi gahunda yose haba mu bijyanye no gutegura ibizamini ndetse no kubikosora.”
Muri uyu mwaka abakandida bakoze ibizamini bya leta mu bumenyi rusange bari 46,125 mu mashuri ya Tekiniki 19,916 na 2,891 muri TTC.
Abakandida bigenga mu bumenyi rusange bari 1,481 muri tekiniki ari 1,424 naho muri TTC bari 16.
Minisiteri y’uburezi yatangaje ko ushaka kureba amanota anyura ku rubuga rwa internet rw’Ikigo cy’Igihugu gishinzwe Ibizamini bya Leta (NESA) cyangwa agakoresha ubutumwa bugufi yandika nimero yakoreyeho ikizamini agakurikizaho nimero y’indangamuntu akohereza ku 8888.
IJAMBORYUMWANA.COM
