Ikipe y’Igihugu y’u Rwanda y’abatarengeje imyaka 18, yakatishije itike yo gukina imikino ya nyuma y’Igikombe cya Afurika “U-18 AfroBasket”, izabera Antananarivo muri Madagascar hagati y’itariki 23 Nyakanga n’iya 1 Kanama 2022.
Iyi kipe yabigezeho nyuma yo kwitwara neza ikaba iya mbere mu mikino y’Akarere ka Gatanu iri kubera i Kampala kuva ku wa 12 Kamena 2022 kugeza ejo ku wa 18 Kamena 2022.
U Rwanda rwashimangiye gusoza ku mwanya wa mbere nyuma yo gutsinda Uganda amanota 72-59 mu mukino w’umunsi wa kane w’iryo rushanwa.
Kapiteni w’Ikipe y’u Rwanda, Sano Rutatika Dick, ni we watsinze amanota menshi muri uwo mukino, aho yinjije agera kuri 21.
Ikipe y’u Rwanda isigaje gukina umukino usoza iri rushanwa uzayihuza na Tanzania kuri uyu wa Gatandatu, tariki ya 18 Kamena 2022. Undi mukino usigaye ni uza guhuza Tanzania na Uganda, kuri uyu wa Gatanu.
U Rwanda rwatangiye imikino y’Akarere ka Gatanu (FIBA U-18 Africa Championship 2022-Zone V Preliminaries), rutsinda Uganda mu mukino wa mbere amanota 59 kuri 38, rukurikizaho gutsinda Tanzania amanota 73 kuri 57, mu mukino wa Kabiri.
Kugeza ubu, u Rwanda ruri ku mwanya wa mbere n’amanota 6 kuri 6, Uganda iza ku mwanya wa kabiri n’amanota 4 mu mikino itatu naho Tanzania ni iya 3 n’amanota 2 mu mikino 2.
