Umugabo ukurikiranyweho kwica umugore we n’umwana we w’imyaka Itatu yemeye ko yabishe akoresheje isuka, mu rubanza rwaburanishirijwe mu ruhame, kuri uyu wa 24 Werurwe 2026, mu Kagali ka Bujyujyu, Umurenge wa Muyumbu mu Karere ka Rwamagana.
Mu rukerera rwo 12 Gasahyantare nibwo mu ishyamba riherereye mu Kagali ka Bujyujyu hasanzwe umurambo w’umugore witwa Nyiransengimana Anne Marie ndetse n’umwana we w’imyaka Itatu yari ahetse witwa Niyogisubizo Delphine bigaragara ko bishwe.
Ku ikubitiro hahise hakekwa Umugabo wa nyakwigendera ahita atabwa muri yombi.
Imbere y’inteko iburanisha yari yateraniye muri aka Kagali, uwo mugabo yabajijwe niba yemera icyaha, atazuyaje asubiza ko acyemera.
Ati:”Ndacyemera, nari mfitanye amakimbirane n’umugore, nari namuhaye ibihumbi magana atanu nyuma mwakamo ibihumbi ijana arabimpa, andi najya nyamusaba agakomeza kuyanyima akayabika akambwira ko atazayampa ahubwo adateganya kubana nanjye ahubwo ngomba kwimuka, akambwira ko impamvu tutazabana ari uko afite undi mwana yabyaye ahandi bityo tutabana neza.”
Yakomeje asobanura uburyo yakozemo icyaha agira ati: “Kuri uwo mugoroba naramuhamagaye ngo ampe amafaranga yanjye ambwira ko atari buyazane, nka samoya n’igice nahise njya kumucyura nkuko nsanzwe mucyura, ngeze aho mutegerereza ndamuhamagara arambwira ngo araza saa yine, nahise njya kureba isuka yanjye aho nari narayitijije, akingeraho yarambwiye ngo niko ngutera icyuma urabyibuka? Nanjye nti ndabyibuka nibwo nahise mfata ya suka mpita nyimukubita mu mutwe n’umwana nawe mpita mukubuta indi bose bahita bapfa.”
Ubushinjacyaha bwamusabiye igihano cy’igifungo cya burundu kitagabanyije kubera ko uwo mugambi yawucuze, akica abantu babiri kubushake.
Amakimbirane uyu muryango wabagamo yari ashingiye kuri uwo mwana wishwe kuko Atari yaramubyaranye n’uwo mugore.
Umwanzuro w’urubanza uzasomwa ku wa 5 taliki 27 Werurwe 2026 mu ruhame, aho iburanisha ryabereye.
