Umwanditsi w’ibitabo, Uwamahoro Rosine, yasabye ababyeyi kujya basomera abana ibitabo kuko bibukamo icyizere bikabungura ubumenyi ndetse bigafasha bamwe kugera ku nzozi zabo nkuko na we yabaye umwanditsi abikesha gusomerwa inkuru ku ishuri n’iwabo mu rugo.
Yabigarutseho mu muhango wo kumurika igitabo yise A Boy who Painted the Moon, kigamije kugaragaza ko umwana ufite inzozi ashobora kuzigeraho.
Uyu mwanditsi avuga ko kera akiri umwana muto yiga mu mashuri abanza, abarimu bakundaga kubasomera inkuru zirimo izivuga kuri; Bakame, Ngunda, Petero Nzukira, Ma Coline, Hobe n’izindi yagera mu rugo abavandimwe n’ababyeyi be bagakomerezaho, bituma akura akunda gusoma no kwandika inkuru.
Ati: “Izi nkuru zose badusomeraga zari zigamije kwagura imitekerereze no kurushaho kumenya neza ururimi. Byanamfashije kugera ku nzozi zanjye”.
Mu gitabo yamuritse, A Boy who Painted the Moon, Uwamahoro, agaragaza uburyo ababyeyi baba bakwiye gushyigikira inzozi z’abana.
Ati: “Ni igitabo kigamije kuremamo umwana icyizere cy’uko nta nzozi atageraho, nko kuba Umupiloti, Umukinnyi w’ikirangirire mu mupira w’amaguru, wabigeraho ndetse ngamije no kwereka ababyeyi ko ari byiza gushyigikira abana babo.”
Uwamahoro yasabye ababyeyi gukunda gusomera abana inkuru kuko byongera ubusabane hagati yabo.
Ati: “Ndabasaba gutoza abana banyu gusoma. Gusoma byongerera abana urukundo hagati yanyu na bo, byongerera abana ikizere ndetse bibafasha gukura mu mitekerereze yabo, bagatekereza kurenza ibyo babona.”
Umubyeyi witabiriye imurikwa ry’icyo gitabo, Umutoni Diane, akaba afite umwana w’imyaka 10 na we wanditse igitabo akacyita Seana au Paudium, avuga ko kwegera umwana bituma umenya inzozi ze ndetse ukaba wanamufasha kuzigeraho.
Yagize ati: “Inama nagira ababyeyi bagenzi banjye ni ugutoza abana gusoma kugira ngo imitekerereze yabo irusheho kwaguka kandi bisaba guhozaho bakanabereka ko nubwo ari bato ariko bashoboye bibaremamo ikizere.”
Mukamuhire Ernestine, uhagarariye Akitabu Publisher, ifasha abanditsi kugurisha ibitabo, avuga ko ababyeyi bakwiye gutoza abana gusoma kuko bituma bibafungura mu ntekerezo.
Ati: “Dukurikije ibihe tugezemo, imbuga nkoranyambaga, bituma impano yo gusoma ita agaciro. Ariko nk’inzu y’ibitabo, turifuza y’uko ababyeyi baha umwanya abana, bagasoma, bakabasomera ibitabo, bakabitangira bakiri bato. Iyo usomeye abana ibitabo, barafunguka mu bwenge, bunguka amagambo mashya, bigirira ikizere cyo kuvuga.”
Ubushakashatsi bwa siyansi cyane cyane mu bijyanye n’imikurire y’abana no mu bumenyi bwo mu bwenge, (neuroscience na psychology) bwemeza ko gusomera abana atari ibintu byo kwidagadura gusa, ahubwo ari ishingiro ry’imikurire y’ubwonko, ndetse ko abana basomerwa ibitabo kenshi bakiri bato bagira imbaraga nyinshi mu bice by’ubwonko bifasha mu gushushanya ibintu mu mutwe (mental imagery) no gutunganya amakuru y’ururimi.
Munezero Jeanne D’Arc/ ijamboryumwana.rw
