Abana bagize amatsinda y’isuku n’isukura no kurwanya imirire mibi mu bigo by’amashuri (wash and nutrition clubs) bagaragaje ko bamaze gusobanukirwa n’uruhare rwabo mu kurwanya imirire mibi n’igwingira mu miryango bakomokamo no ku mashuri bigaho, binyuze mu gutegura Indyo yuzuye no kwimakaza isuku, harimo no gusobanurira ab’amikoro make ko bishoboka.
Ni umusaruro w’ubukangurambaga bwa World Vision bwo kurandura imirire mibi n’igwingira bwiswe Enough Campaign, bushyirwa mu bikorwa n’Impuzamiryango Iharanira uburenganzira bwa Muntu (Cladho) binyuze mu mahugurwa ahabwa abanyeshuri bagize amatsinda y’isuku n’isukura n’imirire myiza mu bigo bigamo.
Mu kiganiro na Isango Star, umwana witwa Umutoniwase Dina wiga mu Kigo cy’amashuri cya G.S Rwimishinya cyo mu Karere ka Kayonza yagaragaje ko mubyo basobanukiwe bagomba no gufasha abandi kumva harimo ko gutegura indyo yuzuye bidasaba amikoro ahambaye.
Yagize ati “Umuntu agiye gutegura ifunguro adafite ubushobozi buhambaye ntabwo yajya kugura amafi cyangwa inyama kuko zirahenda. Yagenda akagura nk’indagara z’Ijana [100 Frw] agasoroma nk’imboga rwatsi akaza agashyiramo, akagenda akagura nk’utunyanya akagura nk’imyumbati niba atayihinga agashyiramo urumva ko indyo yaba yuzuye.”
Umutoniwase yavuze ko ubumenyi bungutse butuma bagira uruhare mu gufatanya n’ababategurira amafunguro, Iwabo mu Ngo no ku ishuri bigaho.
Ati: “Hari igihe iyo bagiye guteka, ubuyobozi bw’Ikigo butwemerera gukora ibintu byose ku bijyanye n’indyo yuzuye. Turageda tukajya ku gikoni tukabwira Abatesti uko bazajya babigenza. Tukavuga ngo wenda uyu munsi tugomba kurya amashu, imboga, ibintu nk’ibyo tukavuga tuti, kandi ibyo byose baba bagomba no kubikorana isuku kuko babitetse gutyo bafite umwanda ntacyo byaba bimaze nubundi mwagira igwingira.”
Umukozi ushinzwe gukurikirana ibikorwa bya Cladho, Murwanashyaka Evariste na we wari muri icyo kiganiro yavuze ko mu byo bigisha abana Isuku ari ingenzi.
Ati: “Mu bukangurambaga turi gukora muri Enough campaign ni uko isuku n’isukura bijyanirana n’imirire myiza cyangwa no kubigisha imirire myiza hagamijwe kurwanya igwingira, n’uburyo bwo gutegura indyo yuzuye. Kuko indyo yujuje ibisabwa ariko idafite isuku irongera igatera ikibazo.”
Muri ayo matsinda abana basobanurirwa ko bagomba kugira uruhare no mu bindi birimo nko gutera imirima y’imboga no kuzitaho no gukurikirana ko ibipimo by’ifunguro bafata ku ishuri byubahirizwa.
Leta y’u Rwanda ku bufatanye n’Imiryango itari iya leta bakora iyo bwabaha ngo igwingire ricike.
Ubushakashatsi bw’Ikigo cy’Iigihugu cy’Ibarurishamibare (NISR) Ku buzima n’imibereho, bwatangajwe muri uku Kuboza 2025 bugaragaza ko igwingira ryagabanyutseho 6% hagati y’umwaka wa 2020 na 2025. Ryavuye kuri 33% rigera kuri 27%.
Buri myaka Itatu World Vision itegura ubukangurambaga bugamije kurandura kimwe mu bibazo biba bibangamiye imibereho myiza y’abana.
Ubw’uyu mwaka bwiswe Enough Campaign bwatangiye mu 2024 buzarangira 2026 mu bihugu byose uwo muryango ukoreramo.
Inyigisho za Cladho zo kwigisha abanyeshuri bahuriye muri Club z’Isuku n’Isukura n’imirire myiza, zitangwa mu bigo by’amashuri byo mu Turere World Vision Ikoreramo mu Rwanda.
