Buri mukino w’umupira w’amaguru utangira, hari umuco wihariye ugaragara ku kibuga: abana binjirana n’abakinnyi, bafata ukuboko kwabo maze bakajya mu kibuga hamwe. Uyu muco, uzwi nka Player Escort, ni uburyo bwo kugaragaza ubusabane, icyubahiro, no guteza imbere inzozi z’abana.
Abana bajyana abakinnyi mu kibuga baba bafite hagati y’imyaka 6 na 18. Bahagarara iruhande rw’umukinnyi mu gihe indirimbo y’igihugu iririmbwa, kandi rimwe na rimwe bakagira uruhare mu gutwara amabendera cyangwa ibindi bikoresho by’umuco w’umukino. Ibi bituma umukino uba urenze gusa kuba amarushanwa, ahubwo uba igikorwa cy’umuco n’uburezi.
Uyu muco watangiye muri Brezile mu myaka ya 1970, ubwo Ronan Ramos Oliveira, wari ushinzwe itangazamakuru muri Clube Atlético Mineiro, yatangiraga gutumira abana binjirana n’abakinnyi. Uko imyaka yagiye ishira, uwo muco wagiye ukwira ku rwego mpuzamahanga, kugeza no ku mikino minini nka UEFA Euro na Igikombe cy’Isi.
Impamvu nyamukuru y’uyu muco ni uguteza imbere uburenganzira bw’abana, kubibutsa abakinnyi ko hari abantu babareba, no kongerera abana icyizere cyo kubona inzozi zabo zishyirwa mu bikorwa. Mu bihugu bimwe, abana bahitwamo binyuze mu marushanwa ategurwa n’abaterankunga nka McDonald’s cyangwa Lidl, mu gihe ahandi haba harimo no kwishyura amafaranga kugira ngo umwana abone ayo mahirwe.
Uretse gutanga umwanya wihariye ku bana, uyu muco unibutsa abantu bose ko umukino w’umupira w’amaguru utari gusa intambara y’amakipe, ahubwo ari n’urubuga rw’ubumwe, urukundo n’amahoro. Abana binjirana n’abakinnyi ni ikimenyetso cy’uko umukino ushobora kuba isomo ry’ubuzima, aho inzozi n’indangagaciro zifatwa nk’iby’ingenzi.
